元朗大棠紅葉之旅+新國際餐廳+泛后甜品~

講左N年去影紅葉,今年頭終於實現了,田會長提議去影大棠影紅葉,當然十卜啦想去好耐了!本身4人幫去,不過AERIS唔舒服要下次先呀,約定你下次XD!我、田會長同 king 一行3人去影了。因為大家都好少去元朗果頭,要研究下路線,先去朗屏站等,搭K66巴士,大棠谷落車,等巴士時發現原來好多人都去,因為見到好多拎單反既人仕,太好了,唔洗驚迷路呀。

成車人差唔多都係大棠谷個站落車,大家都係同一個方向,有少少中學旅行時既感覺,途經荔枝山莊、保良局賽馬會大棠渡假村、一直見到大欖郊野公園去石梯,穿過燒烤場向山上一直行,見到田夫仔就差唔多接近了,初步相信呢段路大約行了一小時十五分鐘到,當行山咁行都幾正架,因為條路好平,只係有少少斜。

直行見到好多人,原來見到紅葉,大家都停低影相,太好了!比想像中多,之前仲擔心冇乜紅葉呢,係時候出動1年都冇用過既單反了,影左陣再一直行,沿途都見到紅葉,不過好多都枯了。

直至去到呢個位,大家都停低了,亦係最多人、最多紅葉、最危險既一個位置,接近山邊有幾5-6棵紅葉樹,大家都要小心同守秩序行,一亂就好易差錯腳碌落山...可見大家都幾有heart影同守秩序呀XD~!我地都影左唔少呢。

夕陽無限好。

差唔多5點幾到走人了,沿返下山條路走,都有好多人同一時間走唔會靜呀,好充實同滿足之旅,行下山個人都精神D,影到好靚既紅葉。

紅葉之旅後落元朗食飯,雖然知元朗好多野食,不過我只知日本野同甜品,但咁凍唔想食日本野咁冰冷,上OPENRICE睇勝利牛丸出名,又熱,於是去搵了,點知原來好早閂門,7點收舖了...可惜。見隔離有間似茶記既野,寫住國際咩都有得食咁,仲要有煲仔飯食,吸引左我地去了。

環境都幾大,似茶記。



好勁係佢疊餐牌,真係好壯觀,多到呢......雖然預左食煲仔飯,不過都忍唔住睇仲有D咩食,有茶餐、扒餐、煲仔飯、叫餸食飯...好多呀。



都係食煲仔飯正。

田雞黃膳煲仔飯,$58,好似都幾貴下,不過好耐冇食過田雞同田膳,一於照了。

餸方面真係好少,又細件,可用粒來形容,味道普通,飯真係好唔掂...一點都唔似煲仔飯,冇香味得個硬。

送埋碟菜,反而碟菜OK。

唔敢包其他好唔好食,不過煲仔飯真係唔洗諗,唔知係唔係食物多原化太雜,變左水準爭點呀。

之後又想食甜品,唔想食B仔,去了泛后甜品食,要左個黑白有滑,係豆腐布甸同芝麻糊,有甸味道好淡,有少少似豆腐花,黑芝麻糊...似係醬,味道好濃,一個淡一個濃味,配合得都幾好。



田會長的雜果西米露,都幾足料既生果,唔錯呀。

KING的蛋白燉奶,凍天熱食都幾正。

好玩既一日呀。